2009 წლის 1 დეკემბერს, 15:00-ზე საქართველოს სატრატეგიისა და საერთაშორისო ურთიერთობების კვლევის ფონდში გაიმართა პროგრამის “პოლიტიკური პარტიების მხარდაჭერა” კურსდამთავრებულთა დაჯილდოვება. პროექტს ახორციელებს საქართველოს სტრატეგიისა და საერთაშორისო ურთიერთობების კვლევის ფონდი საქართველოში ბრიტანეთის საელჩოს ფინანსური მხარდაჭერით.

პროექტის ფარგლებში, რომლის მიზანიცაა ქართული პოლიტიკური ინსტიტუტების განვითარების ხელშეწყობა, მონაწილეები გაეცნენ ისეთ საკითხებს, როგორიცაა პოლიტიკური სოციოლოგია, პოლიტიკური იდეოლოგიები და სისტემები, პოლიტიკური ანალიზი, ეროვნული უსაფრთხოება, საქართველოს ეკონომიკა, ევრო-ატლანტიკური ინტეგრაცია, ევროკავშირი,  საზოგადოებასთან ურთიერთობის სტრატეგიები და სხვა.

პროექტის პირველი ციკლი წარმატებით დაასრულა 11 პოლიტიკური პარტიის 26-მა წარმომადგენელმა.
პროექტის პრეზენტაციას ესწრებოდნენ საქართველოს პოლიტიკური პარტიების, ასევე დიპლომატიური მისიებისა და საერთაშორისო ორგანიზაციების ლიდერები და წარმომადგენლები.

პროექტის პირველი ნაკადის კურსდამთავრებულებსა და ახალ მონაწილეებს სიტყვით მიმართეს დიდი ბრიტანეთის ელჩმა, ბატონმა დენის კიფმა და საქართველოს სტრატეგიისა და საერთაშორისო ურთიერთობების კვლევის ფონდის პრეზიდენტმა ბატონმა ალექსანდრე რონდელმა.